Në një intervistë të fundit për Bustle, aktorja 57-vjeçare Naomi Watts foli pa filtra për plakjen dhe kirurgjinë estetike, duke sfiduar hapur obsesionin me rininë në Hollywood. “Në një moment të caktuar kupton çfarë të shkon dhe i qëndron asaj. Nuk dua të dukem 25 vjeçe apo si dikush që përpiqet me çdo kusht të duket 25”, u shpreh ajo, duke e bërë të qartë se nuk synon të rikthejë kohën pas.
Watts theksoi se nuk ka bërë ndërhyrje plastike dhe se, të paktën për momentin, nuk e sheh veten duke zgjedhur bisturinë. “Shpresoj që njerëzit përreth meje t’i tolerojnë faqet e mia të varura, sepse tani për tani nuk dua të operohem. Nuk jam as kategorikisht pro, as kundër dhe nuk gjykoj askënd që zgjedh ta bëjë”, tha ajo me një ton të ekuilibruar, duke lënë hapësirë për zgjedhje personale pa paragjykim.
Ndërkohë, raporti i saj me bukurinë është zhvendosur nga grimi i përditshëm te ritualet e qeta të mbrëmjes. “Nëse nuk jam në xhirime, nuk vendos grim në mëngjes. Por çdo natë përpiqem të futem në vaskë, dëgjoj një podcast ose ndez një qiri. Uji i nxehtë me avull më relakson dhe më përgatit për gjumë”, rrëfeu ajo. Një rutinë e thjeshtë, por domethënëse, që reflekton filozofinë e saj të re, më pak presion për perfeksion, më shumë kujdes për veten.
Prej vitesh, Naomi Watts ka qenë një zë i hapur për menopauzën dhe ndryshimet që sjell mosha, duke inkurajuar gratë të flasin lirshëm për këtë fazë të jetës pa turp apo frikë. Rrëfimi i saj i fundit nuk është thjesht një deklaratë për bukurinë natyrale por është një pozicionim kulturor në një kohë kur rinia shpesh shitet si standard i vetëm. Në vend të një lufte kundër kohës, Watts propozon një marrëveshje me të, ta pranosh, ta respektosh dhe ta jetosh me dinjitet.
