“Më qetësonte vetëm ideja që një ditë do bëj fëmijë”/ Dea Mishel rrëfen përvojën që i ndryshoi jetën
Dea Mishel Hoxha, e njohur për praninë e saj të ndjeshme në rrjete sociale, ka ndarë një rrëfim të ndjerë mbi një nga dëshirat më të thella të saj: atë për t’u bërë nënë. E ftuar në emisionin “Canape” në T7, ajo foli hapur për anën e saj më të brendshme, larg etiketimeve të zakonshme të një vajze të bukur që merret vetëm me modë apo pamjen e jashtme.
“Dua shumë të kem fëmijë dhe të kem një familje të madhe. Kam përshtypjen që kur të bëhem me fëmijë, do të jetë fokusi im total aty”, u shpreh Dea me një sinqeritet të prekshëm.
Në të njëjtën bisedë, ajo zbuloi se një vit më parë kishte kaluar një periudhë të rëndë shëndetësore, për të cilën nuk kishte folur më parë publikisht. Megjithatë, në ato ditë të vështira, mendimi se një ditë do të bëhej nënë ishte ajo që i jepte forcë dhe qetësi.
“Vjet, pothuajse në këtë periudhë kam qenë e shtrirë aty në spital, nuk ia kam thënë askujt këtë, dhe doja shumë një shpresë që ta dija që do të shërohesha dhe do të bëhesha më mirë, e vetmja gjë që mua më mbante kur mbyllja sytë dhe përpiqesha të flija e të qetësohesha se kisha shumë dhimbje, mbyllja sytë dhe imagjinoja veten time nënë, thosha unë do të jetoj, unë do të bëj një fëmijë të bukur, do e rris me shumë dashuri dhe kjo ishte e vetmja gjë që mua… as ilaçet nuk më qetësonin sa më qetësonte kjo gjë dhe është një gjë që tani që e them emocionohem, po e pres të ndodhë në jetën time dhe e dua. E di që do të jetë shumë e bukur kur të vijë, në kohën e duhur. Qëllimi im në jetë është që të krijoj familje, të rris fëmijë të lumtur e të përmbushur.”
