Mbrëmjen e djeshme në “Top Story”, Roza Lati ndau një rrëfim të ngrohtë dhe emocional për një nga figurat më të dashura të ekranit shqiptar – nënën e saj, Rita Lati. Teksa bisedonte për trashëgiminë artistike të ikonave të humorit shqiptar, moderatorja ndaloi me krenari te figura e nënës së saj, e cila për të ka qenë gjithmonë më shumë sesa një aktore: një frymëzim personal dhe profesional.
“Rita Lati ka qenë gjithmonë një aktore koketë, por rolet e mia të preferuara, kanë qenë kur ka bërë plakat ose burrat,” – kujton Roza, duke shtuar se shpesh këto role i ndante me aktorin Behar Mera, me të cilin bashkëpunuan për vite të tëra në skenë. “Artist i madh, me një familje të mrekullueshme,” – thotë ajo për Beharin, teksa tregon për kiminë e pazëvendësueshme që e bëri publikun të besonte se ata ishin çift edhe në jetën reale.
Pikërisht kjo marrëdhënie në skenë solli edhe një moment të sikletshëm, por që sot Roza e kujton me të qeshur:
“Mua më quanin vajza e Beharit,” – rrëfen ajo me humor. “Behari ishte i shoqëruar me gruan e tij, mami im me shokun e saj prej 22 vitesh. Organizatori i thotë ‘sa të mirë jeni ju të dy, po atë gocën si e keni. Behar, ty të ka ngjarë apo Ritës’. Dhe Rita që i thotë ‘zotëri, Besa, nusja e Beharit’. Ajo është një pjesë që më ka persekutuar gjithë jetën.”
Pavarësisht vështirësive, Roza e përshkruan Ritën si një grua që nuk u ndal kurrë. Pasi u largua nga estrada, ajo krijoi skeçe që i çonin nga një skenë në tjetrën, vetëm për të mbajtur familjen. Dhe në gjithë këtë rrugëtim, për Rozën, ajo mbetet një figurë që i kujton gjithmonë Marilyn Monroe-n:
“Prandaj dhe unë e kam adhuruar Merlin Monroe, se më dukej si mami im. Por, mami ka eksperimentuar edhe me role të tjera, vdisja fare kur bënte burrin plak.”
