Reperi i njohur shqiptar, Azet, ka habitur fansat me një lajm që askush nuk e priste. Përmes një postimi në Instagram, ai ka bërë të ditur se do të tërhiqet përkohësisht nga muzika për shkak të arsyeve familjare.
“Më vjen vërtetë shumë keq, sepse isha gati dhe i gëzuar që do t’ju takoja, por për momentin nuk është e mundur për mua të mbaj këto shfaqje. E dashur familje! Për fat të keq, jam i detyruar të anuloj Release-Show e planifikuar më 19 shtator, si dhe të gjitha koncertet e tjera për këtë vit, për arsye familjare,” – shkruan ai.
Ky vendim do të thotë që fansat nuk do ta shohin Azetin në skenë këtë vit, por ai nuk i ka lënë pa një surprizë. Reperi ka njoftuar se albumi i tij më i ri, “Playboys im AMG”, do të publikohet sërish më 19 shtator, siç ishte planifikuar.
“Jam shumë i lumtur që më në fund do ta ndaj këtë album me ju dhe jam tepër i emocionuar të shoh se si do ta prisni. Së bashku me albumin do të publikohet edhe një këngë e fundit me një kombinim të veçantë, diçka që nuk është dëgjuar më parë,” – shtoi ai.
Në fund, Azet i siguroi ndjekësit e tij se ky nuk është një lamtumirë përfundimtare:
“Ndonjëherë në jetë ndodhin gjëra që nuk mund t’i planifikojmë. Prandaj, tani më duhet të tërhiqem për një kohë. Por një gjë e them me siguri: do të kthehem më i fortë se kurrë! Faleminderit shumë për mirëkuptimin dhe mbështetjen tuaj! I juaji, Azet.”
Pra, megjithëse skena do t’i mungojë, muzika e tij do të vazhdojë të jetojë përmes albumit të ri që tashmë po pritet me padurim.
