Në një intervistë pa filtra për “Pushime on Top” me Lei Krajën, modelja dhe ish-banorja e “Big Brother VIP”, Loredana Brati, ndau me publikun jo vetëm reflektimet mbi eksperiencën e saj në reality show, por edhe disa zhgënjime personale që kanë lënë shenjë.
E pyetur nëse është në një lidhje, Loredana u përgjigj me një batutë që tërhoqi vëmendje:
“Vazhdoj të jem një shpirt”, tha ajo me buzëqeshje.
Por atmosfera e intervistës ndryshoi kur biseda kaloi te marrëdhëniet e saj me ish-banorët. Loredana përmendi një moment specifik që, sipas saj, ka lënë një shije të hidhur dhe ka ndryshuar mënyrën se si e sheh një nga koleget e shtëpisë, këngëtaren Egli Tako:
“Kam dëgjuar që Egli më ka marrë jastëkun kur kam qenë brenda në Big, i ka hipur me këpucë dhe ma ka vënë sërish te vendi. Këtë gjë që ka bërë Egli, që unë nuk e dija, është diçka që nuk e fshij dot”, rrëfeu ajo.
Loredana nuk nguroi të reflektojë edhe mbi disa zgjedhje që i ka bërë gjatë qëndrimit në shtëpi, veçanërisht lidhur me afrimin me Jozin:
“Ndoshta kur u afrova me Jozin, që në fillim. Nuk do e ktheja kohën pas sepse gjithçka ndodh për një arsye, por kishte momente që ngecja në situata që nuk ishin situata të miat. Dhe thosha: Lori, çfarë po bën, nuk është gjë e jotja!”
Edhe jashtë shtëpisë, zhgënjimet nuk munguan. Teksa foli për ditëlindjen që organizoi pas përfundimit të formatit, ajo tregoi se ndonëse e kishte menduar si një moment mirënjohjeje ndaj miqve, disa prej tyre nuk i qëndruan besnikë qëllimit:
“Në ditëlindjen time, pata shumë të ftuar. I ftova se doja t’u ktheja mbështetjen që më kanë dhënë. Shumë njerëz e panë si mënyrë për të shtuar views dhe para. U ndjeva pak e tradhtuar nga disa njerëz. U zhgënjeva.”
Duket se për Loredanën, rrugëtimi në “Big Brother VIP” nuk ka përfunduar ende – jo në kujtime dhe as në raportet që vijojnë të lëkunden edhe jashtë shtëpisë.
