Si çdo vit, Evrovizion organizon turne muzikor për promovimin e këngëve pjesëmarrëse në shtete të ndryshme të Europës. Këtë vit kënga përfaqësuese e Shqipërisë, “Mall” e kënduar nga Eugent Bushpepa, ka marrë komente shumë pozitive nga publiku, por edhe nga mediat e huaja.
‘Website’-i online, “Metro”, shumë i njohur në Britani, ka bërë një analizë të të gjitha këngëve që u prezantuan në turneun e organizuar në Holandë. Në këtë analizë, kënga “Mall” e Bushpepës është cilësuar si një ndër më të mirat e mbrëmjes. “Surpriza më e madhe e natës erdhi prej Shqipërisë. Performanca e Eugent Bushpepës e këngës ‘Mall’ u prit shumë mirë nga publiku i Amsterdamit. Është një ndër këngët e para që duhet të zgjidhet”, – shkruhet në artikullin e ‘Metro’. Madje në videon e publikuar nga ky ‘website’ duket se publiku është shumë i kënaqur nga zëri i Bushpepës dhe muzika e veçantë e këngës. /revistawho.com
