Meghan Markle refuzon të takohet me Donald Trump, presidenti i SHBA-ve e quan njeri të keq

Familja mbretërore angleze do të mirëpresë në një takim zyrtar presidentin e SHBA-ve, Donald Trump dhe partneren e tij, Melania. Pavarësisht se konsiderohet si vizitë e rëndësishme, Meghan Markle nuk do të marrë pjesë, edhe pse është amerikane. Gjatë kohës së fushatës elektorale në 2016-tën Meghan mbështeti Hillary Clinton, madje shprehej me shaka se nëse do të fitonte Trump nuk do jetonte më në Amerikë. Siç duket Donald nuk e ka ditur këtë gjë dhe tashmë që e ka mësuar e ka cilësuar Meghan si njeri të keq. Një gazetar i “The Sun” në një intervistë me Donald Trump i tregoi se çfarë ka thënë Markle për të dhe e pyeti çfarë mendon ai për dukeshën. “Nuk e dija këtë gjë. Çfarë mund të them? Nuk e dija se ajo ishte e keqe”, është shprehur Trump për Markle. Megjithatë duket se Donald nuk dëshiron të krijojë konflikte me Meghan, sepse më pas ka shtuar se ajo do të ishte një princeshë shumë e mirë amerikane. Gjithsesi Meghan do të jetë e vetmja që do të mungojë në takim, sepse pjesëtarë të tjerë të familjes mbretërore, duke përfshirë edhe Princin Harry, do të jenë të pranishëm. Madje është parashikuar që Donald dhe Melania Trump së bashku me Mbretëreshën Elizabeth do të konsumojnë një drekë private. /revistawho.com