Në një bisedë të sinqertë për podcast-in “Happy Place”, Rita Ora ka ndarë një kapitull të ndjeshëm të jetës së saj, ku krahasimet me të tjerët dhe presioni për të pasur një trup “ideal” ndikuan rëndë në mirëqenien e saj fizike dhe emocionale. Këngëtarja shqiptaro-britanike, që shpesh është vlerësuar për vetëbesimin e saj skenik, ka zbuluar se kjo nuk ka qenë gjithmonë pjesë e realitetit të saj.
“Fillova të sëmuresha shpesh, nuk kisha energji dhe nuk ndihesha mirë me veten. Nuk kujdesesha për trupin tim. Dhe pastaj erdhi mendimi: ‘Nuk jam aq e dobët sa të tjerët – prandaj jam e shëmtuar’. Sot më duket tronditëse që e besoja këtë,” tregoi Rita, duke reflektuar mbi ndikimin që kishin standardet e bukurisë në jetën e saj në fund të të njëzetave.
Në bashkëpunim me fushatën “Self Esteem” të markës Dove, ajo theksoi rëndësinë e rikthimit drejt vetes me mëshirë dhe mirëkuptim. “Është si të takosh atë vajzën e vogël që ishe dikur dhe t’i thuash: ‘Ti je shumë më e bukur se ç’mendon’. Të gjithë meritojmë ta ndiejmë këtë,” shtoi ajo me ndjenjë..
