Ish-finalisti i “Big Brother VIP 3”, Meriton Mjekiqi, ka folur me emocione të forta në emisionin “Goca dhe Gra” në Top Channel, ku ka rrëfyer se prej kohësh nuk ka më asnjë kontakt me djalin e tij. Moderatori, i prekur nga mungesa e të birit, i dërgoi një mesazh publik ish-partneres së tij, duke shprehur mallin dhe dhimbjen që ndien.
“Problemet e mia me nënën e djalit vazhdojnë prej kohësh. Kam humbur çdo kontakt me të, nuk kam asnjë mënyrë për të ditur si është djali im. Ai tani ka mbushur 7 vjeç dhe më mungon shumë. Do të vazhdoj ta kërkoj deri në fund. Besoj se gjyqet do të vazhdojnë, dhe unë do të përballem me gjithçka deri në fund,” u shpreh ai me zë të dridhur.
Meritoni tregoi se ndarja nga ish-partnerja ishte një vendim i përbashkët, për shkak të mosmarrëveshjeve mes tyre, por shtoi se kjo nuk justifikon faktin që i është mohuar e drejta për të parë djalin.
“Fakti që jemi ndarë do të thotë që s’kemi shkuar mirë si çift, por kjo nuk do të thotë që mund të më mohohet e drejta ndaj djalit tim,” tha ai.
Moderatori zbuloi gjithashtu se djali i tij është autik, gjë që e bën edhe më të vështirë mungesën e komunikimit mes tyre.
“Djali im është autik dhe mënyra e tij e komunikimit është shumë më e veçantë e e ndjeshme. Ajo, fatkeqësisht, po e shfrytëzon këtë situatë dhe po më lëndon shumë. Nuk e kam takuar fare, nuk më është dhënë asnjë mundësi,” tha Mjekiqi.
Në fund, pavarësisht dhimbjes, ai theksoi se ruan respekt për ish-partneren:
“Është një nënë e shkëlqyer, por në raportin Loart–Meriton ka abuzuar deri në maksimum,” përfundoi ai.
