Në një kohë kur çdo deklaratë peshohet me kujdes dhe çdo fjalë mund të kthehet në titull, Usher ka zgjedhur të thyejë heshtjen, jo për të ndezur debat, por për të vendosur një nuancë në një histori që po rrëfehet me tone ekstreme. Në një intervistë për “The Enterprise Zone” të Forbes, ai ofron një këndvështrim që nuk kërkon të justifikojë, por të dallojë mes perceptimit dhe përvojës personale.
“Nuk mund ta injorojmë realitetin. Në shumë mënyra, mendoj se disa njerëz persekutohen dhe ndoshta nuk pranohen. Nuk kam asgjë për të thënë për P Diddy-n sepse përvoja ime nuk është ajo që pa bota, sepse ai u keqinterpretua”, shprehet ai, duke e vendosur theksin te diferenca mes narrativës publike dhe asaj individuale. Një deklaratë që nuk mohon realitetet, por as nuk i redukton ato në një dimension të vetëm.
Në të njëjtën linjë, Usher nuk e fsheh respektin për ndikimin që Diddy ka pasur në industrinë e muzikës dhe në rrugëtimin e tij personal. “Shumë njerëz përfituan nga ajo që ai krijoi. Kjo është arsyeja pse e shoh atë si një trashëgimi”, thotë ai, duke e lidhur figurën e tij me një epokë që ka formësuar kulturën pop. Përtej polemikave, ai e përshkruan si një mentor të rreptë, por të vlefshëm, një figurë që, sipas tij, ka ndikuar drejtpërdrejt në mënyrën si ai e ka ndërtuar veten si artist dhe biznesmen.
“E respektoj emrin e tij sepse kuptova se ajo që mësova përmes biznesit erdhi si rezultat i gjërave të jashtëzakonshme që isha në gjendje të bëja dhe mënyrës se si e pozicionova veten si biznesmen”, shton Usher, duke ofruar një reflektim që shkon përtej lajmit dhe prek thelbin e marrëdhënieve në industrinë e famës, kompleksitetin e tyre.
