Më 14 gusht Noizy do të mbajë koncertin gjigand “Alpha show” sheshin “Nënë Tereza” në kryeqytet. Koncerti i ideuar nga Noizy, kantautori që ka thyer rekorde shikueshmërie brenda dhe jashtë vendit. Pas 16 vitesh karrierë, Noizy është gati të realizojë projektin e tij gjigand që për më tepër pretendon ta kthejë në traditë për Tiranën. Në koncert do të jenë të pranishëm disa prej artistëve më të mirë të momentit si Loredana, Ylli Limani, Dhurata Dora, Kida, Ledri Vula, Xhensila Myrtezai, MC Kresha, Gue, Ghali, Sfera Basta, Krept & Konan, Raf Camora, etj.
Për të prezantuar të gjitha detajet e këtij projekti Noizy mblodhi miqtë e bashkëpunëtorët e tij, të botës së muzikës e medias në një festë të koncertit “Alpha show”.
“Do të jetë një koncert me përmasa e standarte ndërkombëtare, që po ndodh për herë të parë në Shqipëri e në një skenë gjigande rreth 450 metra katrorë. Vendosa ta organizoj si dedikim e shenjë falënderimi për të gjithë adhuruesit e muzikës sime “old school”-sat” dhe “new school-sat”, që e meritojne këtë eksperiencë të jashtëzakonshme. E kam pasur si dëshirë të kahershme këtë koncert, që në fillimet e mia por atëherë nuk kisha as mundësi ekonomike, as kohë e as ekipin e duhur. Tani kam mundur t’i bëj bashkë të gjithë këta faktorët dhe jam shumë i lumtur për këtë fakt. Vendosa ta quaj “Alpha” këtë koncert për të simbolizuar njerëzit, artistët që arrijnë të bëhen lider e jo boss-a, që nuk presin por e kërkojnë dhe e krijojnë vetë, me shumë mund e sakrificë rrugën e suksesit të tyre, ashtu siç kam bërë edhe unë, në 16 vitet e karrierës sime muzikore. Nuk do të jem vetëm në këtë koncert të madh por me ajkën e ansamblit të madh të artistëve që bëjnë HIP – HOP e rrap, e sigurisht me një pjesë të mirë të atyre që kam bashkëpunime”, ka thënë Noizy në fjalën e tij.
Hyrja për të gjithë pjesëmarrësit do të nisë në orën 18:00 që gjithçka të jetë gati për në orën 20:00 kur nis koncerti. Numërimi mbrapsht ka filluar, “Alpha show” do ta “djegë” Tiranën.
