Miss Universe shpalli fituese të kurorës pjesëmarrësen meksikane, Fátima Bosch, në ceremoninë e mbajtur të enjten, më 20 nëntor, në Impact Challenger Hall në Bangkok, Tajlandë. Megjithëse u vlerësua me titullin më të lartë, triumfi i saj u errësua nga një polemikë e madhe që përfshiu drejtorin tajlandez të kompeticionit, Nawat Itsaragrisil.
Pak ditë para finales, në një transmetim të drejtpërdrejtë në rrjetet sociale, Itsaragrisil u pa teksa e qortonte ashpër Bosch për mungesën në një xhirim të sponsorizuar, duke e ofenduar publikisht dhe duke e quajtur “budallaqe”. Bosch u largua e qetë nga ambjenti, ndërsa disa prej konkurrenteve e ndoqën për ta mbështetur. Pamjet u bënë virale dhe shkaktuan reagime të shumta, duke sjellë në trend hashtagun #WeStandWithFatima.
Më vonë, në prononcimin e saj për mediat, Bosch deklaroi: “Sjellja e regjisorit ishte plotësisht e padenjë. Nuk do të lejoj askënd të më nënçmojë.” Organizata Miss Universe, si edhe drejtues të tjerë, reaguan duke dënuar veprimet e Itsaragrisil dhe duke shprehur mbështetje për Bosch dhe garueset e tjera. Drejtori tajlandez publikoi më pas një kërkim falje dhe u largua nga disa prej përgjegjësive të tij në konkurs.
Kështu, fitorja e Fátima Bosch në Miss Universe u shënua jo vetëm nga kurorëzimi i saj, por edhe nga një prej skandaleve më të përfolura në historinë e këtij eventi.
