Pas ndarjes së bujshme nga Megan Fox, reperi dhe aktori Machine Gun Kelly ka vendosur të flasë hapur për dhimbjen dhe gabimet e tij në albumin e fundit. Në albumin e tij të shtatë, “Lost Americana”, artisti 35-vjeçar ka përfshirë një këngë që flet drejtpërdrejt për periudhën e vështirë dhe reflektimet personale gjatë kohës që qëndroi në qendrën e rehabilitimit.
Kënga “Treading Water” përshkruan me ndjeshmëri momentet e trishtimit dhe zhgënjimit që e shoqëruan në jetën personale, ku Machine Gun Kelly shpreh se ndjen se “do të vdesë vetëm”. Në vargjet e këngës ai thotë:
“Kjo do të jetë hera e fundit që më dëgjoni të kërkoj falje, lotin e fundit që do ta shpenzoni për mua, e rrëzova këtë shtëpi.”
Saga Blade, vajza e tyre, erdhi në jetë në mars të këtij viti, ndërsa shtatzënia e Megan Fox u bë publike në nëntor 2024. Pak javë më pas, dyshimet për tradhti dolën në dritë pasi Megan dyshohet se gjeti “mesazhe nga gra të tjera” në celularin e reperit, përfshi kitaristen e grupit Sophie Lloyd, gjë që çoi në ndarjen e çiftit.
Në po të njëjtën këngë, Machine Gun Kelly shpreh sinqeritetin për gabimet e tij:
“Unë ua prisha pushimet, dhe gënjeshtrat nuk vdesin, ato rriten, dhe çdo gjë që përpiqesh të fshihësh, përfundimisht del në shesh.”
Ai vazhdon me këto fjalë të dhimbshme:
“Bisha vrau bukurinë, petali i fundit ra nga trëndafili. Dhe unë të desha aq shumë, prandaj është e vështirë të të lësh të ikësh.”
Reperi gjithashtu ka treguar se këtë këngë e ka shkruar gjatë Krishtlindjeve në Dhomën 3 të qendrës së rehabilitimit, duke thënë se kishte “mbledhur valixhet” për të kaluar atë periudhë të vështirë.
