Miliarderi Bill Gates, ka zbuluar se ishte i shqetësuar se vajza më e vogël, Phoebe, do t’i kërkonte para për të nisur biznesin e saj. Phoebe Gates, 22 vjeçe ka lançuar së fundmi një aplikacion të ri për tregti elektronike të quajtur Phia. Platforma u ofron blerësve një mënyrë të thjeshtë për të krahasuar çmimet e produkteve të reja dhe të përdorura në mijëra faqe shitjeje.
Kur dëgjoi për herë të parë idenë e vajzës së tij, Gates tha për The New York Times: “Wow, shumë njerëz e kanë provuar dhe ka disa lojtarë të mëdhenj në këtë fushë”.
Ai pranoi gjithashtu se kishte frikë se e bija do t’i kërkonte fonde për ta financuar projektin.
“Mendova, ‘Oh, tani do të vijë dhe do të kërkojë para’”-u shpreh ai. “Dhe më pas do ta mbaja nën kontroll të rreptë, do të bënim rishikime të rregullta të biznesit, gjë që do ta kisha të vështirë, ndoshta do të isha tepër i butë me të, por do të më lindnin dyshime nëse ishte gjëja e duhur për të bërë. Fatmirësisht, kjo nuk ndodhi”.
