Historia e tensionuar mes Jeff Bezos, Lauren Sanchez dhe vëllait të saj, Michael Sanchez, ka marrë një kthesë të re. Çifti më i përfolur i biznesit ka depozituar në Gjykatën e Lartë të Kalifornisë një kërkesë për të rikuperuar gjithsej 190,556 dollarë nga Michael, pjesë e një beteje ligjore që po zgjat prej vitesh.
Sipas dokumenteve të padisë, shuma përfshin 182,374 dollarë në tarifa avokatësh dhe 8,182 dollarë në shpenzime të tjera ligjore. Këto, sipas tyre, lidhen me një mocion të fituar për rrëzimin e një padie të konsideruar “pa bazë” dhe një kërkesë tjetër për mbulimin e kostove.
Përplasja mes palëve nisi që në vitin 2019, kur pas divorcit të Bezos nga MacKenzie Scott, doli në pah lidhja e tij me Sanchez. Pak më vonë, revista National Enquirer kërcënoi të publikonte materiale të ndjeshme, dhe ishte vetë Bezos që pranoi ekzistencën e disa fotove “të diskutueshme”.
Michael Sanchez ka mohuar kategorikisht publikimin e “fotove të pahijshme”, por ka pranuar se ka ndarë informacione të tjera. New York Times më pas raportoi për një marrëveshje konfidencialiteti mes tij dhe American Media, që kishte në fokus informacionet dhe fotot që provonin romancën Bezos–Sanchez.
Në vitin 2020, Michael paditi Bezos për shpifje, por gjykata në Los Angeles vendosi pro miliarderit. Një vit më vonë, Bezos fitoi 218,385 dollarë si rimbursim i shpenzimeve ligjore. Megjithatë, saga nuk ka përfunduar, pasi Michael vazhdon të akuzojë çiftin, duke i quajtur ata “gënjeshtarë” dhe sistemin ligjor “të korruptuar”.
