Ministrja e Mbrojtjes Mimi Kodheli ka shprehur ngushëllimin e saj për vdekjen e dy të rinjve ushtarakë të cilën humbën jetën tragjikisht ditën e sotme, pas rrëzimit të helikopterit në Malësinë e Madhe. Përmes një mesazhi mallëngjyes në Facebook, Kodheli ngushëllon familjarët dhe i uron shërim të shpejtë, të riut të tretë ushtarak që mbeti i plagosur dhe ndodhet në Spitalin e Traumës. “Floriani dhe Donaldi ishin të destinuar për të qëndruar në qiell. Qielli ishte puna, detyra, pasioni i tyre. Atje lart u prehshin! Dhimbje, pikëllim, trishtim për humbjen e dy ushtarakëve të devotshëm, dy pilotëve të talentuar, dy djemve model për shoqërinë. E kishin jetën përpara, por ranë në lule të moshës, në krye të detyrës. Nuk kam fjalë të ngushëlloj nënat e tyre. Vuaj bashkë me to. I shërbyen vendit dhe dhanë jetën për të. Lutem për shpirtin e tyre. Shërim të shpejtë Geraldit!”, ka shkruar ministrja.
