Miq të vjetër dhe partnerë në muzikë, këngëtarët shqiptarë zbulojnë detajet pas bashkëpunimit të tyre

Pas suksesit tek ‘Kënga Magjike’, Olsi Bylyku dhe Lorenc Hasrama kanë sjellë një tjetër bashkëpunim shumë të suksesshëm, me titullin ‘Opium’. Të ftuar sot në emisionin e Rudina Magjistarit, djemtë kanë folur pak për këtë projekt, duke zbuluar dhe disa detaje rreth shoqërisë së tyre. Olsi ka zbuluar se ato njihen që në fëmijëri dhe se familjet kanë një marrëdhënie shumë të mirë. Olsi ka qenë djali tipik rrëmujaxhi, ndërsa Lorenci shumë ndryshe nga ai, i lindur për violinë. Ata gjithashtu kanë folur për bashkëpunimin e tyre të parë, i cili nuk është ai që ju mendoni. “Kënga e parë e jona është që kur unë kam qenë tek ‘Portokallia’. Ashtu si u publikua, ashtu u fshi nga ‘Youtube’. Videoklipi u realizua brenda një natë, madje dhe grimin e kemi bërë vetë. Kam marrë gjërat e mamit dhe jemi lyer vetë, dukeshim gjysmë të zinj dhe gjysmë të bardhë”, është shprehur Olsi me humor. Më pas, në ekran u shfaqën momente të projekteve që Olsi dhe Lorenci kanë sjellë ndër vite. “Humori dhe muzika janë shumë të rëndësishme për mua. Asnjërën nga këto nuk i ndaj dot. Gjysmën e ditës e kaloj në skenë dhe gjysmën në studio”, ka shtuar Olsi, duke treguar kështu se nuk ka ndërmend të heqë dorë as nga aktrimi, as nga muzika./revistawho.com