E ftuar mbrëmjen e sotme në emisionin e fëmijëve ‘Në kurthin e Piter Pan’ ka qenë këngëtarja e njohur Miriam Cani. Familja e saj sigurisht që është vënë në qendër të pyetjeve nga fëmijët. E pyetur mbi momentin e lindjes së Ameli ajo ka treguar historinë nga fillimi dhe ajo çka mund të themi është se nuk kemi dëgjuar më të veçantë se kjo. “Si vajzë trime që jam vendosa të lind në mënyrë natyrale, por zgjati nja 18 orë në spital dhe u vendos që duhet të operohesha. Në Gjermani, atje ku Ameli ka lindur kanë si traditë që nënën e zbulojnë te pjesa e sipërme dhe fëmijën e zhveshur e vënë mbi trupin e nënës që të dëgjoj rrahjet e zemrës dhe të ndjejë aromën e saj”,-ka thënë këngëtarja.
Më tej ajo tregon ndodhinë e pazakontë që përfshin edhe Albanin. “Meqë unë isha në efektin e narkozës ju drejtuan Albanit dhe i thanë: “Mund të zhvisheni”, ndërsa ai ju përgjigjet “Nuk do lind unë sot!”. Unë isha akoma në gjumë, ndërsa siç tregon Albani, atë e futën në një dhomë dhe i vunë Amelinë në gjoks. I vetëm në dhomë dhe shumë në merak për vajzën nuk lëvizi fare nga pozicioni që ishte për 25 minuta derisa ju mpi kurrizi. Kjo përkoi me momentin që unë u zgjova”,-tregon më tej Miriam.
Dhe si për ta mbyllur historinë ajo zbulon detajet e fundit kur dëgjon zërin e Albanit duke thirrur për ndihmë, ndërsa mjekët shkojnë t’i marrin vajzën nga duart. “Kur hyn në dhomë më thotë: “Gjermanët janë të çmendur, këta nuk janë normalë”,-thotë Miriami duke qeshur. Përsa i përket ëndrrave të Amelisë, këngëtarja siguron se do ja lënë asaj në dorë të ndjekë ëndrrat e saj./revistawho.com
