Në një kohë kur shumë aktivitete kulturore dhe jo vetëm u anulluan për shkak të pandemisë ‘Covid-19’, eventi i përvitshëm ‘Miss Shqipëria 2020’ u zhvillua disa ditë më parë në qytetin e Lushnjës, në kuadër të 100-vjetorit të Kongresit.
Në një intervistë për ‘NewsBomb’, organizatorja e ‘Miss Shqipëria’, Alda Bida ka treguar se organizimi nuk ka qenë i lehtë, por dashuria dhe pasioni për t’i dhuruar njerëzve një tjetër kujtesë ishte shtysa më e madhe për të.
“Dukej sikur stafi i Deliart, i bashkisë së Lushnjës dhe konkurrentët ishin një familje e vetme për gjatë gjithë ditëve të zhvillimit të eventit. Në të gjitha rastet matja e temperaturës, maskat dhe distancimi social ishin ritual i zakonshëm. Ne shqiptarët kemi shprehjen ‘Ruaju që të të Ruaj’, moto e ‘Miss Shqipëria 2020’ ishte ‘Besojini ëndrrave, dashurisë dhe kujdesuni për veten…..jeta vazhdon’. Për gati më shumë se një muaj vajzat e përzgjedhura u angazhuan me provat, xhirime e ‘photoshooting’. Për shkak të pandemisë, duartrokitjet ishin të regjistruara, komunikimi në distancë.
Publiku i kufizuar u ul në karrige me një metër e 20 cm distancë, në hyrje iu mat temperatura dhe u dezinfektuan. Dashuria për atë çfarë duam, mbështetja e jashtëzakonshme e së qytetit të Kongresit, kujdesi për njëri-tjetrin. Ja kështu ia dolëm, bashkë, por duke ndjekur protokollin e pandemisë”, ka treguar Bida e pyetur se si ka mundur ta origanizojë eventin në një kohë pandemie.
Alda ka treguar gjithashtu se arsyeja pse u zgjodh qyteti i Lushnjës për t’u zhvilluar eventi ka qenë për shkak se ky ishte viti i 100-vjetorit të Kongresit të Lushnjës, ndaj dhe ideatori dhe protagonisiti i tij, Petri Bozo zgjodhi atë vend.
Bida e ka përkufizuar këtë edicion të ‘Miss Shqipëria’ si një sfidë dashurie dhe kujdesi, pasi gjithë kohës në të janë respektuar të gjitha masat e nevojshme ndaj ‘Covid-19’, duke ruajtur shëndetin e gjithëkujt.
“Miss Shqipëria nuk është thjesht një spektakël, por një shkollë, një traditë dhe Shqipërisë e shqiptarëve u ka dhuruar shpirt të atyre që e bëjnë, i ka shpënë shqiptarët atje ku nuk kanë mundur t’i shpien këmbët apo rrotat e makinës. Vlerësimin e bën publiku dhe vajzat e bukura e të mençura që çdo vit duan të jenë pjesë e Miss Shqipërisë. Miss Shqipëria është hapësira e vlerë ku dukjes i bashkohet edhe inteligjenca e ku koha merr vlera cilësore”, ka pohuar Alda teksa ka treguar se pse i duhet një ‘Miss’ Shqipërisë.
Bida ka theksuar se ky spektakël udhëton çdo vit për të bërë bashkë bukurinë dhe kujtesën historike të vendit të shqiponjave, e cila edhe këtë vit mundi të realizohej me sukses falë mbështetjes së bashkisë së qytetit të Lushnjës./revistawho.com
