Ajo quhet Madeline Stuart është një nga shumë të rinj e të reja që janë me Sindromen Down, por ka gjetur mënyrën si t’ja dalë të realizojë ëndrrat e saj. Dje ka qenë dita ndërkombëtare e Sindromës Down dhe për të frymëzuar të gjithë ata fëmijë dhe të rinj që i përkasin kësaj kategorie ‘Jonathan Center’ ka sjellë në Shqipëri, modelen e parë profesioniste me këtë Sindormë. Ajo është e bukur dhe shumë e dashur, di si të përcjellë pozitivitet dhe erdhi për t’ju dhënë të gjithëve mesazhin se nëse dëshironi të prekni ëndrrat mund ta bëni, pavarësisht kushteve në të cilat ndodheni.
Mbrëmjen e kaluar si për të përmbyllur vizitën e saj në Shqipëri ajo ishte e ftuar bashkë me të ëmën, Roseanne në ‘Top Show Magazine’. Kjo e fundit foli për të gjithë rrugëtimin e së bijës drejt suksesit. “Unë dua që nëpërmjet vajzës time, Madeline t’ju jap shpresë të gjithë atyre prindërve që kanë fëmijët me Sindromën Down. Mos u dorzoni, por motivojini fëmijët tuaj dhe bëhuni mbështetje për ta. Ata mund të arrijnë çdo gjë, si vajza ime”, -ka thënë Roseanne./revistawho.com
