U bënë plot 13 vjet tashmë që kur Evis Ahmeti është shndërruar në përçuesen e historive të pafundme të dhjetëra e qindra shqiptarëve. Nga studio e saj, me “Zemër të hapur”, ajo është përballur me lloj-lloj ngjarjesh, drama të paparashikuara, por edhe karaktere e emocione që vështirë se të tjerë në vend të saj do t’ia dilnin t’i menaxhonin. Megjithatë, në çdo dalje publike të drejtpërdrejtë Evisi ia ka dalë të japë kontributin e saj shërues për çdo plagë sociale duke u përpjekur gjithnjë e më shumë t’u rikthejë buzëqeshjen njerëzve në nevojë.
Në një intervistë të fundit për revistën “Psikologjia”, Evisi ka treguar se jashtë studios, është familja ajo që e mban me këmbë në tokë e që e mbështet në ҫdo hap professional e personal, duke i falur lumturi pa fund e përkushtim maksimal.
Përkushtimi dhe misioni që ka për vite me radhë programi i saj, ia kanë prishur Evisit qetësinë. Siҫ tregon ajo, është një program me emocione të forta dhe nuk është e lehtë të përballosh çdo ditë transmetimin live e maratonë duke menaxhuar ҫdo lloj të ftuari e emocioni që mbart kushdo prej tyre: “Është e pamundur emocionalisht mos të përfshihesh në gjendjen dhe problemet që personazhet shprehin në studio. Në çdo moment ndjej nevojën e tyre, duke menduar se në atë karrige jam unë. Duke menduar në këtë mënyrë, gjej shumë forcë brenda vetes për të vazhduar të ofroj gjithçka mundem për ta, të bëhem zëri dhe forca e tyre” – rrëfen Evisi për Psikologjia.
Por jashtë studios dhe profesionit, Evisi tregon se janë dy njerëz shumë të afërt që tregojnë kujdes maksimal për të: “Qortues, vëzhgues dhe rregullator njëkohësisht, është bashkëshorti im. Kujdesi që tregon deri në detaje që të jem në perfeksion, i cili po aq bën dhe rolin e kritikut. Kjo më jep ndjesi lumturie që vetëm ai di ta falë, përkujdesje maksimale. Besoj që një grua nuk do të donte më shumë se kaq për të qenë e lumtur: realizim profesional dhe përkujdesje familjare, që është ndërthurja më perfekte ku njëra barazon tjetrën…”
Ndërsa njeriu që e frymëzon më shumë Evisin është vajza e saj, e cila është një lumturi më vete për Evisin: “Sa për motivimin, këtë ndjesi të përfituar prej 27-vjetësh është familja ime (bashkëshorti dhe vajza) është ajo që më ka mbështetur fort e motivon këtë ndjenjë lumturie të vazhdojë. Më pëlqen qetësia. Ajo simbolizon lumturinë për mua, shëndeti fizik dhe mendor përbën atë që quhet lumturi. E këtë unë e gjej vetëm tek ata të dy….”./Class
