Pas deklaratës së aktores shqiptare Eliza Dushku se ishte ngacmuar seksualisht në moshë shumë të vogël, kjo çështje ngjalli diskutime në të gjithë botën.
Ngacmimet seksuale në Hollywood janë një fenomen i pranishëm gjithmonë e më tepër në radhët e botës së showbiz-it.
Pavarësisht se nuk pranohen me zë të lart apo më keq akoma mund të shihen si diçka normale, shumë vajza të njohura në Shqipëri e pranojnë ekzistencën e këtij fenomeni.
Një prej tyre është moderatorja Einxhel Shkira e cila e ftuar në emisionin “Opinion” ka rrëfyer se në moshën 14 -vjeçare është terrorizuar pasi një femër e njohur i ka kërkuar të “bëjë qejf” me meshkuj të pa njohur.
“Një person i njohur, femër madje, jo mashkull, ka dashur që për hir të famës, të bënim gjëra të pahijshme ose të na prezantonte me njerëz më të mëdhenj në moshë që kishin kënaqësira të ndryshme. Kjo gjë mua më ka terrorizuar. Kam qenë 14 vjeç dhe më ka terrorizuar. Më janë dashur 10 vjet që të rikthehesha te dëshira ime për t’u marrë me televizion”, – tha Einxhel.
Ndërkohë për identitetin e personit në fjalë Einxhel tha se do e zbuloj në një moment të dytë.
“Emrin e këtij personi, në një moment kur të jem shumë e fuqishme, patjetër që do ta them. Por tek unë kanë lënë mbresa edhe ato fjalë që ka thënë ajo, “po do shkojmë, po do bëjmë qejf, pse të mos bëjmë qejf?” – vazhdoi Einxhel.
Moderatorja e njohur: Kam qenë 14-vjeçe kur një femër e njohur donte të më prezantonte me meshkuj
