Moderatorja e njohur e ekranit shqiptar, Adelina Hasani, ka ndarë me publikun momentin më të rëndësishëm të jetës së saj: ajo është bërë nënë për herë të parë. Lajmin e ëmbël e ka shpërndarë përmes një videoje prekëse në Instagram, ku ka dokumentuar çastet e para të takimit me vajzën e saj.
Vogëlushja ka lindur më 29 maj dhe ka marrë emrin Zoi. Bashkë me partnerin e saj, Besart Hoxha, Adelina ka vendosur ta ndajë këtë moment të paharrueshëm me ndjekësit. Në përshkrimin e videos, ajo ka shkruar fjalë të ndjera për dashurinë që ndjen për të bijën dhe lidhjen që ajo dhe Besarti kanë krijuar me të që në momentin e parë.
“Jeta me ty sapo ka nisur dhe është shumë më e bukur sesa e kam imagjinuar gjatë nëntë muajve të shtatzënisë…”, shkruan Hasani, duke e shoqëruar mesazhin me ndjenja të sinqerta. Ajo shton se, ndonëse e ardhmja mbetet e panjohur, dashuria që ndjejnë për Zoin do të jetë gjithmonë udhërrëfyesja e tyre.
