E premtja e kësaj jave solli mbi ekran reagimin e fortë të drejtoreshës së Qendrës Kombëtare të Kulturës për Fëmijë, znj. Monika Lubonja, e cila pyetjes së Arian Çanit se cilën kolege do donte ta zhdukte nga skena iu përgjigj me emrin e aktores Shegushe Bebeti, e cila luan në Teatrin e Kukullave, institucion në varësi të Lubonjës. Më poshtë vijojnë pyetje-përgjigjet e saj me Arian Çanin:
Monika Lubonja, në një jetë tjetër, cilën nga koleget e tua do doje ta zhdukje nga qarkullimi?
Ah sa kam unë, po… Ata që janë intrigantë dhe mosmirënjohës.
Kjo s’do të thotë asgjë. Është një gjë e drunjtë që e përdorin politikanët…
Jo, jo, s’ka lidhje. Lëri politikanët, se nuk marr vesh fare nga politika. Ta them një emër. Ta marr guximin ta them një emër? Lëre se s’po e them se do më hidhen se i kam dhe në punë. E kuptojnë vetë ata.
A janë njerëz të panjohur?
Jo, janë njerëz të njohur. Unë flas për njerëz të njohur publikisht.
Thuaje, thuaje…
Ta them? Shegushe Bebeti.
Një sekondë tani, ky është emër i dëgjuar për mua. Po kjo zonja është aktore tek Teatri i Kukullave. Dale një sekondë tani, ti je drejtoreshë, pse nuk e heq?
Nuk e heq, sepse është “Mjeshtre e Madhe e Punës”.
Po ndërkohë ti nuk e do?
Unë mund të mos e dua, por është aktore e mirë. Do luajë, do interpretojë. Nuk ka rëndësi.
Por dy ditë pas intervistës, gazetarja Fiori Dardha ka shprehur opinionin e saj për këtë reagim përmes një statusi në ‘Facebook’ dhe nga gjuha e përdorur duket shumë e revoltuar.
“Pyetjes se cilën kolege do të doje të zhdukje nga qarkullimi, një drejtoreshe/artiste e një instucioni shtetëror i përgjigjet duke artikuluar emrin e vartëses se saj.
Nuk po diskutoj fare faktin që vartësja e saj është një artiste e madhe, e vlerësuar me çmimet më të mëdha artistike e profesionale në vend, por jam e skandalizuar nga deklarata totalisht e papërgjegjshme e kësaj drejtoreshe. Këtu nuk flitet për marrëdhënie njerëzore, por institucionale.
Ata LART arrijnë ta kuptojnë se sa e rrezikuar është kjo vartëse që është e detyruar të durojë edhe të tilla deklarata publikisht? Arrijnë ta kuptojne se ç’dhunë psikologjike mund të ushtrohet mbi këtë artiste?
Arrijnë të kuptojnë së ç’mund t’i bëjë kjo drejtoreshë e mllefosur çdo ditë?
Tmerr! Ku jetojmë!”, – shkruan Fiori, e cila ka marrë përgjigje në komente edhe nga vetë aktorja Shegushe Bebeti.
“Fiori të falenderoj për vlerësimin e dashur. Të them të drejten nuk jam aspak e frikësuar nga deklaratat e papërgjegjshme të titullares, sepse unë e kam bërë karrierën me talent, përkushtim dhe punë të palodhur. Edhe pse për momentin shtanga kur ma thanë, pasi e pashë në ritransmetim, thashë me vete që Zoti i rregullon gjërat me dorë. Duhej të dilte publikisht që publiku ta njohë dhe ta kuptojë se kush e drejton institucionin më të rëndësishëm në edukimin e fëmijëve, “Teatrin e Kukullave”. Mjerim”, – ka përfunduar Bebeti.
