Bleona Qereti, artistja e njohur shqiptare që gjithmonë tërheq vëmendjen me veprime të pazakonta, ka zbuluar se ka “birësuar” një luan të quajtur Sarara në Afrikë. Lajmin e bëri publik përmes një videoje me gazetarin Blendi Fevziu, ku ajo rrëfen me krenari se kjo ishte një dhuratë ditëlindjeje, por njëkohësisht edhe një akt bamirësie që shkon për shpëtimin e jetës së një kafshe të rrezikuar.
“Unë kam marrë këtë dhuratë për ditëlindje,” tha Bleona duke treguar një byzylyk simbolik, i cili përfaqëson përfshirjen në këtë nismë humanitare. Sipas saj, fondet e mbledhura nga kjo nismë – mbi 180 mijë dollarë deri tani – shkojnë për mirëqenien dhe mbrojtjen e luanit Sarara.
Ajo shton se përmes një aplikacioni të veçantë mund të ndjekësh lëvizjet dhe jetën e kafshës, një mënyrë moderne për të ndërthurur teknologjinë me kauza mjedisore dhe shpëtimin e kafshëve të egra.
“Ky është luani im, Sarara. Se sa kam dhënë për të s’mund ta them, unë kam shpëtuar jetën e këtij luani,” u shpreh Bleona. “Ajo që dua të bëj është të takohem me Elon Musk dhe të shpëtoj gjithë kafshët e kësaj bote.”
