Në një moment kur skandali “Epstein” po rikthen në vëmendje emra të njohur të industrisë së modës dhe showbiz-it, Naomi Campbell ka reaguar publikisht, duke kërkuar që të mos akuzohet pa prova. Supermodelja britanike u përmend rreth 300 herë në materialet e publikuara, thekson New York Times, çka nxiti diskutime të menjëhershme në media dhe rrjete sociale.
Përmes një deklarate, Campbell rikujtoi qëndrimin e saj të mëhershëm, duke theksuar:
“E kam thënë në vitin 2019 dhe e them sërish tani, mos më akuzoni kur nuk kam bërë asgjë të gabuar,” ndërsa shtoi se qëndron në solidaritet të plotë me viktimat. Ekipi i saj ligjor mohoi çdo përfshirje në veprimtari të paligjshme, duke pranuar se modelja e kishte njohur Epstein vite më parë, por pa dijeni për aktivitetet kriminale që lidhen me të.
Dokumentet përmendin komunikime, ftesa në evente dhe referenca udhëtimi që sugjerojnë kontakt social mes tyre, por, pa e lidhur modelen me ndonjë aktivitet kriminal apo shkelje ligjore.
Rasti rikthen edhe një herë debatin mbi mënyrën si emrat e famshëm shfaqen në dokumente hetimore dhe pasojat që kjo sjell për perceptimin publik. Për Naomi Campbell, reagimi i drejtpërdrejtë duket një përpjekje për të vendosur kufirin mes kontaktit social dhe implikimit, një vijë e hollë që, në epokën e transparencës mediatike, shpesh bëhet vendimtare.
