Një vajzë 19-vjeçare dhe vëllai i saj adoleshent u arrestuan sot në Durrës pasi akuzohen se kanë shfrytëzuar për prostitucion një vajzë të mitur vetëm 14 vjeçe. Në pranga përfunduan Malvina Skura dhe L.P., 17 vjeç. Sipas Policisë, të dy këta persona kanë ushtruar dhunë fizike mbi vajzën Xh.H., duke e detyruar të punojë si prostitutë për interes të tyre. Ndërkohë, babai i vajzës, Dalip Haka duke folur për “Balkanweb”, është shprehur se, dy të arrestuarit rezultojnë me precedent penal pasi janë të dënuar dhe më parë. Ai thotë se vajza e tij është ndikuar dhe nga ambienti pasi që e vogël është braktisur nga nëna. Haka shprehet se vajza kishte ndërprerë ndjekjen e shkollës pas klasës së tetë. Në shtëpinë e tij, varfëria ekstreme është ulur këmbëkryq dhe tregon se 14-vjeçarja me të atin, gjyshen dhe vëllain jetonin në një ish kabinë plazhi jo më e madhe se 20 metra2, në mes të së cilës kishin edhe një gropë septike që e përdornin si tualet. Të katërt jetonin me pensionin e gjyshesh, ndërsa vetë Dalipi punonte si tregtar ambulant, pa mundur të sigurojë ndonjë të ardhur të madhe. Babai Dalip Haka thotë se e bija pasi kishte braktisur shkollën në klasën e 8-të ishte larguar nga banesa me një njeri që gjoja e donte, por pas disa kohësh ka vërejtur një tatuazh në trupin e saj, me emrin e një tjetër mashkulli. “Nga ky moment më bëri të dyshoja që kishte marrë rrugë të keqe, ndaj shkova edhe në polici që vajza të rikthehet në shtëpi dhe në shkollë”,- thotë ai. Më tej i ati tregon edhe një moment të sikletshëm, kur merr sinjalizime se i bija i punonte si prostitutë. “Dëgjova që më thanë se kishte dalë tek ura e Dajlanit për prostituim, por shkova atje dhe nuk e gjeta vajzën, doja që ajo të vazhdonte shkollën”. Haka tregon se vajzën dhe djalin i ka rritur i vetëm pasi gruaja e ka braktisur që kur fëmijët ishin ende të vegjël. “Problemi jonë i madh është se dy fëmijët e mitur i kam rritur vetë se gruaja i ka braktisur. Më ka ndihmuar nëna. Kur ishte vajza 5 vjeç gruaja më braktisi”,- shton ai. Ndërsa gjyshja, Shega është e sigurt që mbesa e saj 14-vjeçare është larguar me L.P, 17-vjeçarin e arrestuar sot pas denoncimit të vajzës. “Vajza tha që jam martuar me djalin që e trafikonte. Më tha ika, u rrëmbeva dhe nuk kthehem në shtëpi…ndërkohë që vinte na takonte po asnjë lekë nuk na sillte…”,- tregon e moshuara. Historia e 14-vjeçares u bë publike pas denoncimit të saj në policinë e Durrësit se Malvina Skura e vëllai i saj L.P e kanë shfrytëzuar për qëllime prostitucioni në hotele të ndryshme kundrejt një pagese nga 30 në 50 mijë lekë të vjetra. Policia e Durrësit i arrestoi të dy pak pas denoncimit. Nga hetimet e Policisë, rezulton se e mitura kryente marrëdhënie me klientë, të cilët i gjenin të arrestuarit. Për raport, ajo paguhej 3 000 – 5 000 lekë.
