Motra i del në mbrojtje Cristiano Ronaldos dhe i quan portugezët mosmirënjohës

Pas paraqitjes së fundit kundër Spanjës në Ligën e Kombeve, Cristiano ka marrë kritika dhe motra e tij i ka dalë në mbrojtje. Gazeta “A Bola” vuri në dyshim nëse Santos duhet ta zgjedhë më titullar golashënuesin më të mirë të historisë së luzitanëve kur Botërori është në prag. Këto kritika nuk i pëlqyen Katia Aveiros, e cila shpërtheu në Instagram duke i quajtur portugezët mosmirënjohës. “Cristiano ka në krah familjen e tij dhe ata që e duan. Dhe këta njerëz do të jenë gjithnjë në krahun e tij, pavarësisht gjithçkaje. Por ajo që ndodh tani nuk më surprizon aspak. Portugezët kanë pështyrë në pjatën ku kanë ngrënë dhe gjithnjë kështu ka qenë. Portugezët janë të këqij, injorantë dhe mosmirënjohës. Është një djalë i gjunjëzuar në tokë dhe askush nuk i jep një dorë. Është mizore, sepse ka dhënë dhe po jep shumë. Ai në tokë quhet Ronaldo dhe është thjesht futbollisti më i mirë në botë”, shkruan ajo.