Në një rrëfim emocional në një episod podcast-i, Khloé Kardashian ka kujtuar një nga momentet më të vështira të jetës së saj: momentin kur zbuloi se ish-bashkëshorti i saj, Lamar Odom, po e tradhtonte.
Khloé dhe Lamar ishin të martuar nga viti 2009 deri në 2016, megjithëse jetesa e përbashkët e tyre kishte marrë një kthesë në vitin 2013 për shkak të problemeve me besnikërinë dhe varësinë e Lamar-it ndaj substancave.
Duke folur për episodin e dhimbshëm, Khloé kujtoi se ishte rreth 26 vjeç kur mori vendimin të ndjekë Odom-in dhe përfundoi në një motel në qendër të Los Angeles-it. Ajo tregoi: “Kur shkova te dhoma, pashë përmes dritares që ishin të dy të zhveshur.” Ky ishte momenti kur zemërimi e përfshiu plotësisht. “M’u gjakosën duart nga grushtat,” rrëfeu ajo, duke shtuar se menjëherë më pas ishte detyruar të merrte pjesë në një event familjar si të mos kishte ndodhur asgjë.
Kur Lamar kërkoi të kuptonte se si ajo kishte zbuluar vendndodhjen e tij, Khloé kujton se i tha: “Nuk më intereson të të jap shpjegime. Pse je në një motel në L.A. në orën 3 të mëngjesit?”
Në të njëjtin rrëfim, Khloé pranoi se në të kaluarën kishte përdorur gjurmues për të ndjekur makinat e partnerëve të saj, diçka që e quajti një “fiksim” dhe “varësi”.Sot, thotë ajo, është më e fortë dhe e vetëdijshme për kufijtë që duhet të vendosë.
Kardashian ka folur edhe më herët për tradhtitë e Odom-it. Në një intervistë të vitit 2016, ajo pranoi se ai kishte qenë shumë i mirë në fshehjen e gjithçkaje, dhe për një kohë të gjatë nuk kishte patur dijeni për pabesinë e tij. Rrëfimi i saj u mbështet më vonë edhe nga Odom, i cili në vitin 2019 shprehu pendesë për veprimet e tij, duke deklaruar se ndihej keq për gjithçka që kishte ndodhur.
Në një episod të fundit të “The Kardashians”, ata u përballën me të kaluarën, ku Odom pranoi gabimet e tij dhe kërkoi falje, ndërsa Khloé theksoi se ajo kishte nevojë ta mbyllte atë kapitull për të ecur përpara.
