Higjiena brenda shtëpisë së “Big Brother VIP Kosova” është kthyer prej javësh në një nga pikat më të nxehta të debatit, si mes vetë banorëve ashtu edhe jashtë mureve të shtëpisë. Pamjet e hapësirave të përbashkëta të lëna pas dore, mbeturinat e shpërndara dhe mungesa e rregullit kanë nxitur reagime të forta nga publiku në rrjetet sociale.
Pavarësisht paralajmërimeve të përsëritura, duket se situata nuk ka pësuar përmirësim. Për këtë arsye, Vëllai i Madh vendosi të marrë një masë ndëshkuese konkrete. Gjatë mbrëmjes, alarmi i shtëpisë u aktivizua dhe banorët u njohën me vendimin: çmimi i madh është ulur me 2,000 euro, duke zbritur nga 173,000 në 171,000 euro.
Sipas njoftimit zyrtar, ky penalizim vjen si pasojë e mungesës së përgjegjësisë kolektive për mirëmbajtjen e pastërtisë. Jo vetëm kaq, por Vëllai i Madh paralajmëroi se nëse neglizhenca vijon, çdo të diel mund të ketë ulje të tjera të çmimit final, duke rritur presionin mbi banorët.
Përveç higjienës, banorët janë kritikuar edhe për paraqitjen e tyre të pakujdesshme, gjë që ka shtuar pakënaqësinë e publikut.
