Pas takimit me kreun e Kuvendit, Ilir Meta, kryeministri Rama ka marrë pjesë në një panarin profesional, i cili ka pasur sot ditën e tij të hapjes.
Në fjalën e tij Rama u shpreh se vendit i kanë munguar shumë profesionistët dhe tregoi rastin e tij personal me rrobaqepësit.
“Unë do thoja se vendit tonë i mungojnë edhe rrobaqepës, duke patur edhe problem timin për shkak të përmasave që më janë përcaktuar nga ime më dhe im atë”, tha Rama, shkruan sot “Panorama”.
Sipas tij “kaq shumë përfaqësues të komunitetit të miqve dhe partnerëve ndërkombëtarë tregojnë rëndësinë e arsimit profesional. Deri tani unë nuk i kam parë gjithë këta njerëz të mbledhur për krizën politike, siç i shoh këtu sot për arsimin profesional. Besoj shumë se kriza më e rëndë ndër gjithë gamën e krizave që ne trashëguam, është kriza e papunësisë rinore, dhe adresimi më i rëndësishëm i gjithë spektrit të politikave tona të reja, është adresimi i kësaj krize”.
