Monologu i Mustafa Nanos në emisionin e tij ‘Provokacija’ ku mori si shembull Ilda Bejlerin dhe Bora Zemanin për të dhënë opinionin e tij në lidhje me veshjen e femrave në televizion, ngjalli shumë debat. Jo vetëm nga ana e dy moderatorëve, por edhe nga shumë personazhe të njohur pati një sërë përgjigjesh e kundërpërgjigjesh për këtë temë. Megjithatë ende nuk është mbyllur gjithçka, sepse në një intervistë për ‘Panorama Plus’ Mustafa Nano ka shpjeguar çdo gjë. Ai ka argumentuar se kjo nuk është diçka personale me dy vajzat e ekranit, por përkundrazi është një problem që ka përfshirë botën mbarë.
“Ky nuk është një problem i imi. As edhe një problem me dy vajza. As edhe një problem shqiptar. Është një problem i botës së sotme të hiper-seksualizuar, në të cilën vajzat e zhveshura po na faniten kudo, edhe aty ku nuk ta pret mendja, e ku lakuriqësia po shihet si një shenjë force, afirmimi e pushteti në përpjekjet për barazi gjinore. Sikur feministet e famshme të historisë së botës, prej atje ku janë, të shihnin në skena të mëdha koncertesh këngëtaret; Miley Cyrus, Lady Gaga, Madonna, apo edhe vajzat “tona”; Rita Ora, Bebe Rexha e Dua Lipa, që këndojnë pothuaj të zhveshura me synimin për të afirmuar kauzën e grave në botë ato do të ktheheshin përmbys në varret e tyre. Lëre pastaj të shihnin sojin e Kardashianëve.” ka thënë Nano. /revistawho.com
