Në fillim janari është lajmëruar nga kryeministri Rama se do të jetë Filarmonia e Vjenës në Tiranë. Protagonisti i mbrëmjes është një dhe një i vetëm. Shkëlzen Doli. Gjakovari i lindur në Elbasan, i rritur në Gjakovë, edukuar në Novi Sad e Vjenë. Mirëpo kur politika përzihet me art për përfitim zakonisht arti bëhet pak pis. Pati deri edhe investigime nëse Filarmonia e Vjenës kishte lajmëruar publikisht që do ndodhej në Tiranë. E para unë e kam të vështirë ta besoj njoftimin e Kryeministrit të vendit tim plotësisht. Ne nuk i kemi kapacitetet akustike teknike dhe financiare për të përballuar “të gjithë Filarmoninë”. Nga ana tjetër unë mendoj se lajmet negative të prodhuara rreth këtij eventi kanë një aspekt të drejtë, por një pasojë të gabuar. Sigurisht Kryeministri dëshiron të përfitojë sa të mundet duke e maksimizuar koncertin e organizuar, por rrugës të gjithë ne po bëjmë një gabim trashanik. Po cënojmë Shkëlzen Dolin. Ai nuk na ka asnjë faj, as për Filarmoninë, as për Ramën e për asgjë tjetër në Shqipëri. Përkundrazi. Nëse kemi sot një produkt eksporti që duhet të na bëjë krenar është vetëm Shkëlzen Doli. Përsëriteni pas meje: Shkëlzen Doli!
Nguliteni mirë në mëndje që ai zotëri që investohet të vijë këtu në një fillim janari parashikueshmërisht të zymtë është më patriot se ata me shqiponjën në formë varëse floriri që pështyjnë në rrugë e shkojnë nëpër tallava. Nëse ndokush krijon respekt apriori për kombin tonë pasi dëgjon Filarmoninë e Vjenës në atë koncert të pashoq për nga madhështia është pikërisht për meritë të vetëm një njeriu dhe përpjekjes së tij individuale: Shkëlzen Doli.
Unë personalisht kam një alergji gjenetike për gazetarët që i bëjnë fresk qeverive cilatdo qofshin ato! Por jam sëmurur edhe me alergjinë e shpërndarjes së baltës në mënyrë të njëtrajtshme. Nuk shkova te Nata e bardhë për të dëgjuar Giusy Ferrerin, nuk më dukej dita për të dëgjuar një italiane ndërkohë që ato ditë përkujtonim çlirimin edhe nga ata. Por edhe pse ndihem se Rama nuk më përfaqëson do të shkoj te koncerti i tij në janar, sepse nuk është dhe nuk duhet të jetë vetëm i tiji. Edhe sikur të bëj akrobacira për të marrë meritat. Jo! Është Shkëlzen Doli zonja dhe zotërinj dhe ai është i yni pa nevojë të votohet nga askush. Shqipëria është e gjitha e jona e virtuozi gjakovar i lindur në Elbasan na nderon të gjithëve ne pa përjashtime, pa lista vipash të ftuar në gala, edhe nëse kemi rroba të shtrenjta apo zhele të arnuara, sot dhe nesër ne duhet të jemi krenar për të dhe ta mbështesim me çdo çmim. Dhe për baltën e pashënjestruar mirë që po fluturon rreth atij koncerti e kemi pak për detyrë t’i themi: Na fal Shkëlzen… / revistawho.com
Sqarim: Gjithçka që shkruhet më sipër, është qëndrim personal i gazetarit Flavio Qarri.
