Met Gala 2025 do të mbahet pa një nga ikonat më të mëdha të pasarelës: Naomi Campbell. Supermodelja britanike, që prej vitesh ka qenë pjesë e pandashme e tapetit të kuq më prestigjioz në modë, këtë vit do të mungojë.
Sipas raportimeve nga “The Sun”, Naomi u përjashtua pas një përplasjeje me kryeredaktoren legjendare të “Vogue”, Anna Wintour. Ngjarja që duket se shkaktoi krisjen ndodhi në shtatorin e kaluar, gjatë një eventi në Javën e Modës në New York. Naomi mbërriti me vonesë në ceremoninë e “Harlem’s Fashion Row” dhe, siç thuhet, kjo nuk i pëlqeu aspak Anna-s.
“Unë jam një person shumë i saktë dhe kam nderin t’ia prezantoj sonte dikujt që shpesh vonohet,” – ishte komenti ironik i Anna-s drejtuar audiencës. Por ajo u largua para se Naomi të mbërrinte. Çmimi iu dorëzua më pas nga kryeredaktorja e “Harper’s Bazaar”, Samira Nasr.
Por gjërat nuk përfunduan aty. Në skenë, Naomi reagoi me një deklaratë që ndezi edhe më shumë situatën:
“Nuk ishte zgjedhja ime të kisha zonjën tjetër, do të preferoja shumë më tepër këtë.”
Pas këtij episodi, burimet pohojnë se komentet e saj i kushtuan ftesën në Met Gala:
“Naomi ‘qëlloi’ veten me atë koment. Nuk e kritikon dot mbretëreshën e modës dhe prapë pret të ecësh në tapetin e saj të kuq… Nëse Anna do që të largohesh, do të largohesh.”
Ndërkohë, supermodelja është shfaqur në formë të shkëlqyer në Maldive, ku po kalon pushime me dy fëmijët e saj. Ajo ka folur së fundmi në një video në YouTube ku la të kuptohet se ndoshta nuk do ta shohim më në Met Gala:
“Është e fundit për mua. Nuk mundem… Jam shumë e vjetër. Ankthi është shumë për mua. Nuk e di se çfarë numri është ky, mendoj se mund të jetë ose 20 ose 21. A mund ta imagjinoni?”
Campbell, e cila u bë nënë për herë të parë në moshën 50-vjeçare përmes një surrogacie, ka treguar vazhdimisht se prioriteti i saj tashmë janë fëmijët. E megjithatë, mungesa e saj në Met Gala nuk do të kalojë pa u vënë re. Dhe për një figurë kaq ikonike, një mungesë e tillë nuk është kurrë thjesht një rastësi.
