Një kapitull i artit dhe modës mbyllet sot: Giorgio Armani, dizajneri italian që krijoi një perandori globale dhe përcaktoi standardet e elegancës moderne, është ndarë nga jeta në moshën 91-vjeçare.
Stilisti legjendar ndërroi jetë i rrethuar nga familjarët dhe bashkëpunëtori i tij i ngushtë, Leo Dell’Orco, pas një beteje të gjatë me një sëmundje të rëndë. Lajmi ka prekur thellë botën e artit, duke qenë se Armani ishte aktiv deri në fundin e jetës.
Vetëm disa ditë më parë, ai kishte përfunduar blerjen e lokalit historik “La Capannina”, vendi ku në vitet ’60 takoi Sergio Galeottin, partnerin e tij në jetë dhe në biznes. Në të njëjtën kohë, kishte përfunduar edhe rishikimin e koleksionit të 50-vjetorit të markës së tij, i cili do të prezantohet këtë shtator në Javën e Modës në Milano.
Armani lindi në Piacenza të Italisë në vitin 1934 dhe pas studimeve fillestare në mjekësi, iu përkushtua modës duke filluar si dritare-shtrues vitrinash dhe më pas si stilist për shtëpinë Nino Cerruti. Në vitin 1975, së bashku me Sergio Galeottin, themeloi markën “Giorgio Armani”, e cila shumë shpejt u bë sinonim i luksit të përditshëm dhe elegancës së pastër.
Me stilin e tij minimalist, Armani ndryshoi mënyrën se si visheshin njerëzit, duke thyer rregullat e rënda të modës së viteve ’70 dhe duke krijuar një identitet të ri që u bë i preferuar nga yje të kinemasë, sportit dhe politikës. Ai ishte i famshëm për shprehjen e tij të përhershme të modës: “thjeshtësi e rafinuar, elegancë pa përpjekje dhe forcë përmes finesës.”
Trashëgimia e tij shtrihet përtej pasarelave: Armani ndërtoi një biznes miliardësh me linja që përfshijnë modën, parfumet, hotelet dhe aksesorët. Ai do të kujtohet si njeriu që i dha Italisë një nga emrat më të mëdhenj të stilit dhe botës një gjuhë të re të elegancës.
