Dita e kësaj të premte ka qenë një ditë zie për të gjithë artin dhe kulturën shqiptare. Mjeshtri i Madh i këngëve dhe valleve popullore, Rexhep Çeliku u nda nga jeta në moshën 63 vjeçare për shkak të një sëmundje të rëndë. Artisti numëron në repertorin e tij rreth 8 mijë shfaqje dhe 32 mijë role brenda dhe jashtë vendit. Përpara disa vitesh Çeliku u dekorua me çmimin “Mjeshtër i Madh” nga ish-presidenti i Republikës së Shqipërisë Zoti Alfred Moisiu. Dalja e fundit publike e tij ishte vetëm përpara 4 ditësh, kur mori dhe çmimin “Nderi i Kombit” nga presidenti Ilir Meta. Ndërsa në skenën shqiptare Rexhep Çeliku doli për herë të fundit në 60 vjetorin e krijimit të ‘Ansamblit Kombëtar të Valleve dhe Këngëve Popullore’. Çeliku u bë pjesë e Ansamblit që në moshën shumë të re dhe atje kaloi pothuajse 50 vite të jetës së tij. Homazhet në nder të artistit të kombit do të zhvillohen të shtunën në ‘Muzeun Historik Kombëtar’ nga ora 11:00 deri në orën 13:00.
Ndahet nga jeta mjeshtri i madh shqiptar, kjo është karriera e tij shumëvjeçare
