Aktori turk Ramazan Tetik, i njohur për rolin e tij në serialin “Eşref Rüya”, ka ndërruar jetë në moshë të re pas një periudhe trajtimi në spital.
Sipas mediave dhe kolegëve të tij, Ramazan Tetik ishte shtruar në spital për shkak të një problemi serioz shëndetësor, duke pësuar një çarje të aortës. Pas një operacioni të gjatë, ai vijoi trajtimin në repartin e kujdesit intensiv, por fatkeqësisht nuk arriti të mbijetonte. Raportohet se vdekja e tij ndodhi më 1 prill, duke tronditur botën e artit dhe kolegët. Ai ishte vetëm 37 vjeç.
Para ndarjes nga jeta, ishte bërë një thirrje për dhurim gjaku për shkak të gjendjes së rënduar pas operacionit që zgjati rreth 13 orë.
Seriali “Eşref Rüya” ku Tetik luante, ka protagonistë aktorë të njohur si Çağatay Ulusoy dhe Demet Özdemir.
Lajmi ka shkaktuar reagime të shumta dhe mesazhe ngushëllimi nga kolegët, të cilët e përshkruan si një aktor të talentuar dhe shumë të dashur.
