Ndahet trashëgimia e Robin Williams, gruaja merr vilën

Prej ndarjes nga jeta të aktorit Robin Williams, askush nuk ka arritur të vërë dorë mbi pasurinë e tij. Deri ditën e djeshme, pasi mediat amerikane njoftojnë se familjarët e aktorit kanë arritur një marrëveshje. Sipas avokatit të vejushës Susan Schneider Williams, asaj i kalon vila në plazh në San Francisco dhe do të marrë një pagë mujore deri në vdekje, transmeton “Indeksonline”. Gjithashtu ajo mund të mbajë edhe dhuratat e martesës, një orë dhe një biçikletë shumë të shtrenjtë të ish-bashkëshortit. Ndërsa tre fëmijëve, Zachary i lindur nga lidhja me Valerie Velardi dhe Zelda e Cody, të lindur nga raporti me Marsha Garces, do t’iu kalojnë objekte të tjera personale. Marrëveshja mes tyre pritet të zyrtarizohet nga gjykata, ndërsa ende nuk dihen detaje të tjera. Ylli i kinemasë Robin Williams u nda nga jeta në muajin gusht të një viti më parë në moshën 63-vjeçare. Ai vuante prej vitesh nga depresioni i thellë. Kjo sëmundje u bë shkak që aktori të vetëvritej.