Një lajm i trishtë ka prekur botën e filmit këtë të premte, pasi është ndarë nga jeta aktorja legjendare e komedisë, Catherine O’Hara, në moshën 71-vjeçare. Emri i saj lidhet me dhjetëra role ikonike në kinema dhe televizion, por për miliona shikues ajo do të mbetet përgjithmonë në kujtesë si nëna e Kevinit në filmin kult “Home Alone”.
Homazhet dhe reagimet nga figura të njohura të Hollywood-it nuk kanë munguar. Ndër më prekëset ka qenë ai i Macaulay Culkin, aktorit që interpretoi Kevin McCallister, i cili zgjodhi rrjetet sociale për t’i dhënë lamtumirën e fundit koleges së tij në ekran.
Në postimin e tij, Culkin iu referua O’Hara-s thjesht si “mama”, duke ndarë disa rreshta plot ndjenjë dhe mall. Ai shkroi:
“Mama. Mendova se do të kishim më shumë kohë. Doja më shumë. Doja të ulesha pranë teje. Të dëgjova, por kishte kaq shumë më tepër për të thënë. Të dua. Do të shoh sërish.”
Catherine O’Hara interpretoi rolin e Kate McCallister në dy filmat e parë të sagës “Home Alone”, një personazh që u kthye në simbol të dashurisë dhe përkushtimit prindëror. Ky rol konsiderohet si një nga më të paharrueshmit e karrierës së saj dhe e bëri aktoren të dashur për publikun anembanë botës.
Sipas TMZ, që ishte media e parë që raportoi lajmin e ndarjes së saj nga jeta, shkaku i vdekjes ende nuk është bërë publik. Kujtojmë se O’Hara mungoi edhe në ceremoninë e Golden Globes më 11 janar, ku ishte e nominuar për rolin e saj dytësor në serialin e Apple+, The Studio. Edhe pse e nominuar, arsyet e mungesës së saj asokohe mbetën të paqarta.
Ikona e komedisë lë pas një trashëgimi të pasur artistike dhe kujtime të paharrueshme për breza të tërë shikuesish.
