Ditën e sotme vajza e të madhes Vaçe Zela ka ndarë me të gjithë të afërmit dhe miqtë e saj një lajm të hidhur. Irma Rodiqi ka treguar se babai i saj, Pjetër Rodiqi, është ndarë nga jeta. Ajo ka publikuar në ‘Facebook’ një fotografi dhe bashkangjitur saj ka bërë një dedikim shumë të ndjerë për babain dhe prindërit që tashmë nuk jetojnë më. Vajza e këngëtares së njohur shqiptare ka zbuluar se i ati vuante nga një sëmundje e rëndë dhe është ndarë nga jeta në Shqipëri.
“Një yll më shumë iu shtua qiellit, për të ndriçuar edhe më fort pranë mamit. Me pikëllim të thellë, sot kam barrën e rëndë t’ju njoftoj për largimin nga kjo jetë të babait tim të shtrenjtë, Pjetër Rodiqi. Zoti e dinte dashurinë e tij të pafund për atdheun e dashur, prandaj edhe ia mundësoi ta kalojë këtë sëmundje të rëndë në Shqipërinë e tij të shtrenjtë, që nuk ia zëvendësuan dot kurrë as bukuritë e Vjenës, ku pat lindur, e as të Bazelit, ku për hir të dashurisë e përkushtimit ndaj familjes kaloi 21 vite të jetës së tij. Unë e quaj veten vajzën më me fat në botë, që pata e do të kem gjithmonë në zemrën e në shpirtin tim një baba fisnik e me virtyte të rralla si ai. Me dashuri e mirënjohje të pafund për gjithçka që babai im i shtrenjtë përfaqëson për mua e për këdo që ka pasur fatin ta njohë”, ka shkruar Irma në postimin e saj.
Në muajin prill Pjetër Rodiqi u shfaq për herë të fundit në ekranin e “Top Channel”, në emisionin “Soiree”, që një puntatë të veçantë ja dedikoi artit të Vaçe Zelës.
Gjatë emisionit Rodiqi rrëfeu historinë e njohjes me këngëtaren e ndjerë dhe në fund u shpreh se ishte krenar që të gjithë e quanin si bashkëshorti i Vaçe Zelës. /revistawho.com
