Ermal Mamaqi, një nga figurat më të njohura të ekranit shqiptar, ka vendosur të tërhiqet nga televizioni, duke ndarë për herë të parë publikisht arsyet e këtij vendimi. I ftuar në emisionin “Flet”, me Ilnisa Agollin, Mamaqi u shpreh se ndjeu se kishte ardhur momenti për të mbyllur një kapitull të rëndësishëm në karrierën e tij.
“Mendoj që koha ime për atë lloj show kishte kaluar,” – deklaroi aktori dhe producenti, duke shtuar se kishte vërejtur një rënie në performancën e tij dhe kishte zgjedhur të largohej kur ishte ende në kulmin e suksesit. “E di kur është momenti më i mirë për të mbyllur një bisedë? Kur është në kulmin e saj. E ndjeva që po shkoja poshtë dhe aty mbaroi.”
Mamaqi, i njohur për aftësinë e tij për të ndryshuar rrjedhën e karrierës, theksoi se nuk i mungon televizioni, pasi është i angazhuar në projekte të tjera që i japin më shumë përmbushje personale. “Televizioni është një mashtrim i madh. Nuk më mungon. Kur e realizon veten në forma të tjera, nuk ndien më mungesën e ekranit,” – u shpreh ai.
Megjithatë, për fansat e tij ka ende vend për optimizëm. I pyetur për një rikthim të mundshëm, ai nuk e përjashtoi kategorikisht, por vuri një kusht të qartë: “Më kanë ardhur disa oferta. I kam falënderuar, por nuk më kanë bindur. Nëse do të vinte një projekt ndryshe, sfidues, do ta pranoja me kënaqësi.”
