Në një intervistë që po komentohet gjerësisht, Loredana ka thyer heshtjen mbi raportin e saj me ish-partnerin, Mozzik, duke e zhvendosur fokusin nga historia e tyre si çift publik te dimensioni më i ndjeshëm, prindërimi. E ftuar në podcastin e Arbana Osmanit, reperja foli me tone të forta për sakrificat që, sipas saj, ka bërë për hir të vajzës së tyre.
“Unë e kam duruar shumë, e kam duruar maksimalisht për shkak të pikës sime të dobët, vajzës. Më bëj dëm mua, por jo vajzës,” u shpreh ajo, duke e kthyer deklaratën në një mesazh të drejtpërdrejtë publik. Më tej, Loredana shtoi se:
“Ndoshta mua më urren aq shumë, sa nuk do që të më shohë sytë, ka mundësi dhe ajo, por është okay. Për famë, për personalitetin e vet, është në gjendje me harru edhe vajzën”, një fjali që ka ndezur debatin mbi kufijtë mes konfliktit personal dhe përgjegjësisë prindërore.
Deklarata e saj, e artikuluar me një përzierje force dhe brishtësie, rikthen në qendër të vëmendjes një nga çiftet më të komentuara të skenës urbane shqiptare, duke treguar se pas suksesit, bashkëpunimeve dhe ndarjes së tyre të bujshme, mbetet një histori që ende prodhon jehonë.
Në një industri ku çdo gjë shpesh filtrohet, kjo dalje publike e Loredanës duket se synon të riformulojë perceptimin, jo thjesht si dramë showbiz-i, por edhe si një apel për të mos lënë që konfliktet e të rriturve të rëndojnë mbi një fëmijë.
