A e dini se shumë nga personazhet publikë të cilët ju i adhuroni kanë emra të tjerë në jetën reale dhe tjetër në art?! Mbase edhe mund ta dini (dhe ne bëjmë kot sikur ç’kemi zbuluar), por duam ta sjellim edhe njëherë në vëmendje ata që ndryshe quhen në pasaporta dhe ndryshe në art…
NOIZY
E dini besojmë që reperi i famshëm “Noizy” emrin e vërtetë e ka Rigels Rajku. Djali nga Dibra bëri “zhurmë” që në daljet e tij të para dhe sot është një nga reperët më të kërkuar dhe të famshëm në Shqiptari.
SONI MALAJ
Të gjithë e njohim si Soni, këngëtaren e dhjetëra hiteve që e nisi karrierën si pjesë e grupit “Spirit Voice”. Por në të vërtetë, emri i saj në gjendjen civile shënohet Sonja Malaj…
KASTRO ZIZO
Për kantautorin Kastro Zizo nuk është më një risi zbulimi i emrit të vërtetë. Megjithatë ai nuk mund të rrinte jashtë kësaj liste. Klevis Bega është identiteti i tij zyrtar.
COZMAN
Po emrin e vërtetë të Cozman, a e dini? Reperi 30-vjeçar që është rritur në Londër, emrin e vegjëlisë e ka Ylber.
MOZZIK
Gramoz Aliu është emri i vërtetë i reperit Mozzik, që po ecën me hapa shumë të sigurtë drejt karrierës së tij muzikore.
YOUNG ZERKA
Këngëtari stil nga Korça sigurisht që nuk mund të quhej Young Zerka… Emri i tij është Donald. Pseudonimin Young Zerka ia ka venë një familje xhamajkane kur jetonte sëbashku me ta në Angli.
KIDA
Ishte vetëm 16 vjeç kur nisi karrierën muzikore, e kur iu desh të ndryshonte edhe emrin. Orhidea Latifi është emri i vërtetë i Kidës, e cila prej më shumë se dy vitesh është pjesë e labelit “On Records”. Ideja për të ndryshuar emër ka qenë e menaxherit të saj.
BRUNO
Ai preferon të njihet si Bruno i Threedots, por në fakt emri i tij i vërtetë është Qazim. Për herë të parë ai është zbuluar si talent në “X Factor Albania” dhe duke patur një ngjashëmëri në vokal, por edhe në pamje me këngëtarin Bruno Mars, producentet Vera Grabocka dhe Alketa Vejsiu e pagëzuan me këtë emër.
STINE
E kujt ia merrte mendja që Ernest Duka do të bëhej i famshëm dhe një kantautor shumë i njohur në trevat shqipfolëse. Stine është emri i artit të këngëtarit më “in” të viteve 2000, që do të pushtonte zemrat e të gjithëve, e që u rikthye së fundmi me një hit.
STRESI
Arkimed Lushaj është një “stres” i vërtetë prandaj dhe emrin e artit ka zgjedhur ta mbajë të tillë. Stresinjo është një nga reperët më të suksesshëm shqiptarë dhe një nga emrat më të përfolur të momentit.
LYRICAL SON
Një tjetër reper që nuk mban në art emrin e tij është edhe kosovari, Festim Arifi. Lyrical Son është një nga emrat më të kërkuar dhe të përfolur të repit kosovar.
CAPITAL T DHE 2PO2
Capital T është një nga reperët më të suksesshëm të Kosovës, pasi ka patur një shembull shumë të mirë për të ndjekur dhe ai ka qenë reperi 2PO2, daja i tij. Por të dy nuk përdorin emrin e tyre në art. 2PO2 quhet Besnik, ndërsa Capital T quhet Kushtrim.
MC KRESHA
Kreshnik Fazliu është emri i këngëtarit të hitit “Era”. Kresha numëron një sërë hitesh shumë të bukura në industrinë e muzikës.
MAJK
Majk, fenomeni i ri i muzikës shqiptare, që u kthye në kolonën zanore të 2015-ës me hitin e tij “S’jeno mo”, emrin e vërtetë e ka Kastriot.
GILI
“Xixëllonja” e saj, bëri që të gjithë shqiptarët të dashuroheshin me zërin dhe paraqitjen e një këngëtareje që u prezantua në festival me emrin Gili. Megjithatë emri i saj i vërtetë është Fevzije.
MAYA
Këngëtarja e njohur e muzikës popullore Maya, e ka zbuluar vetë në një intervistë të dhënë para disa kohësh se emri i saj i vërtetë është Fatbardha.
