Mesfushori i Manchester City-t dhe Spanjës, Rodri, është shpallur fitues i “Topit të Artë” për burrat – çmimi që i jepet futbollistit më të mirë të vitit.
Ky është titulli i parë për Rodrin, i cili është gjithashtu lojtari i parë spanjoll që fiton çmimin që nga viti 1960 dhe i pari nga Premier League që triumfon qysh prej Cristiano Ronaldos në 2008.
Gjatë sezonit të kaluar, Rodri humbi vetëm një ndeshje për klubin dhe kombëtaren e tij, duke ndihmuar që Spanja të fitojë Euro 2024 dhe Manchester City Premier Leaguen, Superkupën e UEFAs dhe Kupën e Botës për Klube.
Çmimin e tij e fitoi duke lënë pas anësorin e Real Madrid-it, Vinicius Jr., ndërsa mesfushori anglez i Real Madrid-it, Jude Bellingham, përfundoi në vendin e tretë.
Në çmimet e tjera, Harry Kane dhe Kylian Mbappe ndanë trofeun “Gerd Muller” për golashënuesit më të mirë të sezonit, ndërsa portieri i Aston Villa-s dhe Argjentinës, Emiliano Martinez, fitoi “Yashin Trophy” për herë të dytë radhazi si portieri më i mirë. Lamine Yamal i Barcelonës mori trofeun “Kopa” për lojtarin më të mirë nën 21 vjeç, duke shënuar një tjetër arritje historike për futbollin spanjoll.
Real Madrid u shpall gjithashtu klubi më i mirë i vitit, dhe Carlo Ancelotti fitoi çmimin e trajnerit të vitit.
