Muzika është ushqim për shpirtin e saj. Adelina Ismaili në 40-vjetorin e karrierës vjen me një surprizë. Diva e skenës shqiptare vjen këtë herë jo vetëm si artiste, por si zë i dhimbjes dhe forcës së gruas.
Projekti i saj i ri “GRUA” është më shumë se muzikë, është një thirrje zemre, një përqafim plot ndjesi për të gjitha ato gra dhe vajza që kanë guxuar t’i thonë “Mjaft” dhunës, që kanë zgjedhur të ndërtojnë jetën e tyre me dinjitet dhe dashuri për veten.
Në pesë këngë (EP) të dedikuara grave të Kosovës, heroinave të heshtura të një revolucioni të brendshëm, Adelina rrëfen një histori të re: historinë e gruas që nuk pret më shpëtimtar, sepse ajo ka mësuar ta shpëtojë vetveten.
“Ju jeni forca. Ju jeni inspirimi. Ju jeni liria,” shkruan artistja me ndjenjë të thellë. Projekti “GRUA” është tingulli i krenarisë, dhimbjes, dashurisë – dhe mbi të gjitha, shpërthimit të gruas që ka zgjedhur të jetojë, jo të mbijetojë.
Me këtë projekt jubilar për 40-vjetorin e karrierës së saj, Adelina Ismaili jo vetëm që rikthehet, por përqafon një kauzë që rreh me ritmin e çdo zemre që shumë herë janë përpjekur ta ndalin.
Por jo vetëm kaq, ky projekt është në të gjitha dimensionet i veçantë, sepse vjen në bashkëpunim me Val Krasniqin, bashkëshortin e saj.
”Sot 17 vite nga bashkëpunimi ynë i parë”, ka shkruar Vali në “Instastory”.
