Xhani Shqerra është një prej figurave më të spikatura të medias shqiptare. Përpos profesionit, ai ka treguar se ka një pasion të madh dhe bëhet fjalë pikërisht për udhëtimet. Por jo vetëm kaq, ai është kujdesur të japë kontribut të çmuar për shoqërinë si në mirëinforimin e publikut, ashtu edhe në promovimin e Shqipërisë e kulturës shqiptare në botë. Së fundmi në një nga udhëtimet e tij ka bërë bashkë pasionin dhe profesionin. Gjatë një vizite në Firence ose “vendin më të bukur në botë”, siç edhe Xhani e quan, ai ka takuar kryebashkiakun e këtij qyteti, Dario Nardella-n. Këtë e ka bërë të ditur përmes një postimi në “Instagram”.
“Pata nderit të pritem nga kryebashkiaku i qytetit më të bukur në botë, Firences, Z. @dario_nardella në zyrën e tij për një intervistë mbi marrëdhëniet bilaterale me Tiranën dinamike, kulturën, turizmin, miqësinë me shqiptarët si një nga komunitetet më të mëdha të Firences, si edhe mundësinë e formimit të të rinjve në sektorin e modës”.
Gjatë bisedës, kryebashkiaku Nardella i ka kujtuar moderatorit miqësinë që ndan me kryebashkiakun e Tiranës, Erion Veliajn, duke i kujtuar projektet e përbashkëta që kanë ndarë në fusha të ndryshme, turizmin në veçanti, kryesisht në promovimin e Shqipërisë e Tiranës në Firence e Toscana.
Pjesë e rëndësishme e bisedës, sigurisht janë bërë dhe planet e përbashkëta për kulturën. Xhani Shqerra është ambasador i brand-it të njohur italian “Aquamarine Firenze”, teksa nuk ka hezituar t’i parashtrojë kryebashkiakut të Firences edhe mundësinë e formimit të stilistëve të rinj shqiptarë. Dhe në fund një premtim “për rritjen e prezencës së studentëve shqiptarë në arkitekturë dhe modë”.
