Aktori i njohur turk, Özcan Deniz, po përjeton një periudhë të trazuar pas ndërprerjes së bashkëpunimit disadekadësh me vëllain e tij, Ercan Deniz. Çka nisi si një ndarje profesionale, është shndërruar në një luftë të hapur familjare, ku përzihen borxhe kolosale, akuza për tradhti dhe përçarje të thella.
Për mbi 20 vjet, Ercan ishte menaxheri personal i Özcanit, duke i ndërtuar dhe mbështetur karrierën. Por prishja e partneritetit nuk solli vetëm mbylljen e një kapitulli biznesi — ajo theu dhe urën që i lidhte si familje.
Mediat turke raportojnë se Özcan ka qenë garantues për borxhet bankare të vëllait, të cilat nga 40 milionë TL kanë arritur në 85 milionë TL. Pasuritë dhe llogaritë e tij bankare janë bllokuar, ndërsa bankat kanë vënë në shënjestër çdo të ardhur të artistit.
Situata mori kthesë dramatike kur nëna e tyre, Kadriye Deniz, publikoi një mesazh të ashpër në rrjetet sociale, ku shkroi:
“Kur lidhja e gjakut bie përballë lidhjes së interesit, ajo që mbetet nuk është ‘fëmijë’ por ‘i huaj’. Edhe nëse emri i tradhtarit është ‘jeta’, ai fshihet nga zemra ime. Disa u rrënjosën, disa u shkulën e u larguan. Ata që bashkohen për interes: Özcan, Melek, Sibel, Nurcan… Ju uroj rrugë të mbarë, ua kam lënë Zotin! Ercani dhe Yurda, që u padrejtësuan, u bëfshin si plep i fortë. Nga sot, as për festë, as për përshëndetje…”
Pas kësaj, Özcan reagoi publikisht, duke shpërthyer me akuza ndaj familjarëve:
“Për hir të 40 viteve që më keni vjedhur, do të bëj 40 postime. Ju nuk më keni parë kurrë si fëmijë apo vëlla, por si një mundësi, si një skllav të cilit i keni vënë peng mundin tim. Nuk ju mjaftojnë as pallatet po t’ua dhuroj. Çështja nuk është Səmar, nëna ime e dashur, por tradhtia, pabesia, mosmirënjohja, urrejtja, gënjeshtrat, shpifjet dhe padrejtësia. Edhe ndaj fëmijës tim tregoni armiqësi, ndërsa unë jam përkujdesur për fëmijët tuaj. Sot djali im nuk njeh as gjyshen, as xhaxhain. Kjo është turpi juaj.”
Kjo përplasje mes nënës dhe djalit ka bërë jehonë të madhe në mediat turke, duke e kthyer familjen Deniz në qendër të thashethemeve dhe diskutimeve publike.
