Mbrëmja e 24 nëntorit elektrizoi New York-un. Nëntori Shqiptar për të tretin vit radhazi mblodhi shqiptarët për të festuar 111-vjetorin e Pavarësisë. Në galanë madhështore pati gjithçka, muzikë, etnografi, rrëjnë shqiptare. Mes gjithë atmosferës festive, shqiptarët janë nderuar me kontribute. Prej tyre, edhe supermodelja shqiptare Angela Martini. Ajo është shqiptarja e vetme që ka dalë në top 6 në “Miss Universe”. Por jo vetëm kaq, prej vitesh kontribuon me vepra të mira në Shqipëri.
Në fjalën e saj përshëndetëse, teksa mori çmimin e veçantë për kontributin Angela theksoi se shqiptarët duhet të jenë të bashkuar ashtu si ilirianët që i ka bashkuar besa.
“Kur bëhemi bashkë duhet të jemi ashtu, tamam ilirianët që i bashkon besa. Dhe pikërisht këta shqiptarë duhet të jemi ne, të mos tradhtojmë besën. Të gjithë bashkë, gjithmonë”.
Përmes fondacionit “Angela Martini Foundation”, dhuroi një shumë të konsiderueshme 4 vjet më parë, në kohën kur tërmeti i 26 nëntorit 2019 shkatërroi disa zona, gjithashtu dhe përgjatë pandemisë, ndihmoi shumë prej familjeve në nevojë në qytetin e Shkodrës. Vetëm disa muaj më parë, në ditën e saj të lindjes i dhuroi shkodranëve të zemrës një fushë sportive dhe një kënd lojërash. Për fëmijët, për të ardhmen e çdo shoqërie. Për Angelën, çdo cep i botës plotësohet vetëm aty, në tokën mëmë, në rrënjët shqiptare. Nëntori Shqiptar nderoi Angelën, e Angela Shqipërinë.
