Disa ndërtojnë ura të gurta, e disa ura shpirti. Këto të fundit janë më të forta, më të veçanta, më të paqta dhe më të përjetshme. Këtë bën dhe Neraida juriste në profesion, por me dashurinë më të madhe të të ndërtuarit të urave mes grave shqiptare në të gjithë botën. “Global Woman Club Diaspora” bashkon shpirtrat, bashkon gratë shqiptare dhe Neraida ka një mesazh për to: Bashkohuni, të gjitha jemi në të njëjtin udhëtim.
Ju jeni juriste me profesion, por e konsideroni veten si “ndërtuese urash në shpirt”. Çfarë do të thotë kjo për ju?
-Jurisprudenca më ka mësuar strukturën, disiplinën dhe rregullin, por jeta ime është gjithmonë mbi ndërtimin. Ndërtoj ura mes njerëzve, veçanërisht grave shqiptare, që t’i ndihmoj të gjejnë njëra-tjetrën dhe të krijojnë një komunitet ku mund të ndihmonin dhe frymëzonin njëra-tjetrën. Ky është “ndërtim urash” në shpirt, jo vetëm në fjalë.
Si lindi ideja e “Global Woman Club Diaspora”?
-Klubi lindi nga nevoja për bashkim dhe përkatësi. Diaspora shqiptare është e fuqishme dhe dinamike, por shpesh e fragmentuar. Ka gra që kanë ndërtuar karrierë, familje dhe biznese jashtë vendit, por ndihen të shkëputura nga rrënjët e tyre. “Global Woman Club Diaspora” krijon një hapësirë ku gratë ndajnë histori, mbështesin njëra-tjetrën dhe ndërtojnë bashkëpunime reale.
Cili është koncepti kryesor i klubit?
-Fuqia nuk matet me tituj, por me guxim. Çdo grua që merr pjesë në klub ka një histori, një rrugëtim. Kur njëra ndan përvojën, tjetra frymëzohet. Kur lind një ide, ajo gjen mbështetje për t’u kthyer në realitet. Kur përballet me sfida, gjen forcë te njëra-tjetra. Ky është koncepti ynë: bashkëpunim, jo konkurrencë.
Ju përmendni shpesh besimin, solidaritetin dhe dashurinë si 3 shtyllat e klubit. Si funksionojnë ato në praktikë?
-Çdo aktivitet, çdo takim dhe çdo bashkëpunim në klub bazohet mbi këto tri vlera. Besimi krijon siguri, solidariteti fuqizon rrjetin, dhe dashuria e sinqertë për të ndihmuar njëra-tjetrën është ajo që e bën komunitetin të qëndrueshëm. Pa këto, nuk mund të ndërtojmë ura që zgjasin.
Cilat janë arritjet që iu bëjnë më krenare?
-Shumë gra kanë nisur bashkëpunime ndërkombëtare, kanë ndërtuar biznese të reja dhe kanë gjetur guximin të flasin publikisht për herë të parë. Disa madje janë rikthyer në Shqipëri për të dhënë kontributin e tyre. Për mua, kjo është fitorja më e madhe, jo sukseset individuale, por rrjetet që lindin dhe lidhjet që zgjasin.
Çfarë mesazhi do t’i jepnit grave shqiptare që iu lexojnë?
Mos e mbani dritën tuaj vetëm për vete. Ndajeni. Bashkohuni me ne. “Global Woman Club Diaspora” nuk është thjesht një klub, është një udhëtim që të kujton kush je, nga vjen dhe sa shumë mund të japësh. Kur gratë lidhen, fuqia rritet dhe botën mund ta ndryshojmë së bashku.
