Festa e Miqësisë pas një turi të gjatë në qytetet kryesore të vendit ka ndalesën e saj në Tiranë. Sheshi Skënderbej kthehet tashmë në arenën e dhjetra këngëtarëve të njohur të muzikës.
Për t’i dhënë larmishmëri festës, për herë të parë në Shqipëri, shef Ettore Botrini me çmimin Michelin Star, do të gatuajë në stilin “Street Food” bashkë me kryebashkiakun Erion Veliaj, shef Arvin Kita, shef Bledar Kola, kryetari i bashkisë së natës Briken Fejzullai etj.
Gjithçka ndodh këtë të dielë në sheshin “Skënderbej”. Shijoni mrekullitë e kuzhinës në zgarë, ku shef Ettore do të dhurojë receta “Street Food” me prodhime bio nga fshatrat e Tiranës.
Mos harroni, tek ‘Voilà…Skara!’ nesër, ora 18.00 në sheshin “Skënderbej”.
Kjo është një nismë e Festës së Miqësisë që fillon këtë vit me Tiranën, për ta zhvilluar vitin tjetër në të gjithë qytetet e shqipërisë ku kjo festë shkon. Duke qenë se Festa bën një tur në 15 qytete të vendit dhe duke parë potencialin që këto qytete kanë në kulinari, ajo plotësohet me një mozaik me receta autentike shqiptare në stilin e “street food”.
“Arsyeja pse bëjmë një shoë të tillë është që këtë vit t’i dhurojmë Tiranës disa receta të “street food”, gjithashtu dhe për të ndryshuar perceptimin e personave që gatuajnë dhe konsumojnë produkte zgare. Me këtë objekt mund të bësh shumë gjëra dhe jo vetëm ushqimet bazike dhe qoftet e famshme që ne njohim. Jo pa qëllim kemi zgjedhur titullin ‘Voilà…Skara!’, sepse këndvështrimi i Chef Ettores dhe i organizatorëve të Festës së Miqësisë për skarën është një surprizë për gjithë pjesëmarrësit në këtë festë. Për t’i vënë flakën natës së të dielës do të vijojmë me tej me muzikë “live” të viteve 90 nga Elton Deda, Aleksandër Gjoka, Redon Makashi, Altin Goci, Eneda Tarifa, Bojken Lako, Kastro Zizo deri në orët e para të mengjesit”, shprehen organizatorët.
